Saltar para: Posts [1], Pesquisa [2]

SAPO Desportu TL

Sex | 28.04.17

Hafoin Casillas, karik Terry bele to'o iha FC Porto

SAPO TL

Defeza inglés besik sai hosi Chelsea no média inglés sira hatete katak "dragaun" sira karik bele sai hanesan destinu foun hosi jogador veteranu ne'e. 


 





Bainhira kontratasaun hosi Iker Casillas halo ema barak hakfodak, saida maka bele ko'alia bainhira John Terry iha FC Porto? Defeza inglés hosi Chelsea besik sai no bele duni hametin FC Porto.


 


Tuir avansa hosi jornal "O Jogo", ne'ebé haktuir kanal inglés Sky Sports, jogador veteranu, ho tinan 36, karik besik ona hatais azul iha temporada oinmai.


 


Foto ida ne'ebé jogador fahe iha rede sosial sira, ne'ebé hatudu katak nia aprende hela portugés, fó forsa ba deskonfiansa katak sentral britániku bele troka Inglatera ho Portugal.


 


John Terry fó sai ona katak sei la kontinua joga iha serbisu klube londrinu nian, maibé ne'e la'ós hanesan nia final hosi kareira.


 


António Conte ladún hili nia iha jogu sira, Terry halo de'it jogu hamutuk 11 iha époka ne'e iha Chelsea, la marka golu ida.


 


@SAPO Desporto

Qui | 27.04.17

Portugés na'in tolu nomeadu ba "di'ak liu" iha Fransa

SAPO TL



Bernardo Silva, Leonardo Jardim ho Anthony Lopes iha destake iha kampeonatu fransés. 


 



Bernardo Silva iha jogu entre Mónako ho Lyon. Foto@ Philippe Desmazes/EPA


 


Iha portugés na'in tolu ne'ebé maka nomeadu ba sira ne'ebé di'ak liu iha temporada ne'ebé maka atu aiha kampeonatu fransés, tuir lista hosi Union Nationale des Footballeurs Professionnels (UNFP), ne'ebé fó sai iha loron-kinta ne'e.


 


Anthony Lopes, guarda-rede internasional portugés hosi Lyon, hanesan kandidatu ba guarda-rede di'ak liu, no iha adversáriu sira hanesan Subasic (Monaco), Reynet (Dijon) ho Kevin Trapp (PSG).


 


Époka di'ak ne'ebé Mónako halo iha époka ne'e (iha fatin dahuluk hosi kampeonatu fransés) vale ona nomeasaun. Leonardo Jardim hanesan kandidatu ida ba treinador époka nian. Tékniku portugés, ne'ebé sei kompete mós iha semi final Champions League nian, sei konkore ho naran sira hanesan Unay Emery (Paris Saint-Germain), Lucien Favre (Nice) no Jocelyn Gourvennec (Bórdeus).


 


Ikusmai, hanesan mós importante, maka Bernardo Silva, hosi mós Mónako. Joven médiu portugés sai titular nafatin iha ekipa Mónako nian no nia ezibisaun sira garanti ona nomeasaun ida ba jogador di'ak liu. Silve kompete hasoru Edison Cavani (Paris Saint-Germain), Marco Verratti (Paris Sint-Germain) ho Alexandre Lacazette (Lyon). Jogador, ho tinan 22, sai hela hanesan destake ida hosi emblema Prinsipadu nian, partisipa iha jogu hamutuk 51 no marka ona golu sia.


 


@SAPO Desporto

Qua | 26.04.17

Arsenal konfirma Benfica iha Emirates Cup

SAPO TL

Ekipa londrina fó sai kartaz ba torneiu pré-époka iha tinan oinmai. 


 



Foto: Facebook Arsenal (SAPO Desporto)


 


Arsenal fó sai ona partisipasaun hosi Benfica iha Emirates Cup ne'ebé sei halao«'o iha temporada oinmai. Liuhosi rede sosial sira, klube fó sai ona emblema sira ne'ebé sei marka prezensa iha prova pré-temporada tinan oinmai.


 


Aleinde Arsenal ho Benfica, Sevilha ho Leipzig kompleta "konvokadu sira" ba troféu ne'e.


 


Nune'e, Benfica sei hasoru "gunner sira" iha loron 29 Jullu no jermániku sira iha loron tuirmai. Klube londrino seidauk fó sai loron ba jogu ho Sevilha.


 


@SAPO Desporto

Seg | 24.04.17

Messi marka rua no afasta ona iha luta ba Bota Osan-Mean

SAPO TL



Jogador arjentinu sai hanesan figura hosi enkontru iha Klásiku entre Real Madrid ho Barcelona. 


 



AFP Photo@ Gerard Julien 


 


Hamutuk ona golu 31 maka Messi halo iha temporada ne'e iha kampeonatu. Jogador arjentinu lidera lista ba Bota Osan-Mean nian no ho golu rua ne'ebé marka iha loron-domingu, iha Klásiku entre Real Madrid ho Barcelona, halo tan hakat ida iha konkista ba troféu hosi goleador di'ak liu iha Europa.


 


Iha luta partikular liu ho Bas Dost, avansadu hosi Sporting, ne'ebé lakon oportunidade iha dérbi iha loron-sábadu ne'e, arjentinu sai hanesan figura importante hosi enkontru iha jogu desizivu Liga Española nian, kontribui nune'e ba vitória ho 3-2 hosi 'blaugrana' nian iha "merengue" sira nia kampu.


 


Atakante hosi alviceleste ne'e konsege halakon rekord sira hotu (to'o ona golu hamutuk 500 hamutuk ho Barcelona iha loron-domingu ne'e) no hametin pozisaun ba markador di'ak liu hosi liga europeia sira, fó hakat importante ida ba konkista Bola Osan-Mean nian.


 


Bas Dost iha golu markadu hamutuk 28 no iha pozisaun daruak. Iha luta espesial ne'e, avansadu holandés iha kontra nia númeru hosi jogu sira liga portugeza nian, hasoru española. Ne'e tanba falta jogu haat hodi hakotu liga iha Portugal, no iha España falta neen. Hamutuk minutu 180 liu duké Messi bele marka liután golu sira.


 


Iha fatin datoluk okupa hosi Pierre-Emerick Aubameyang, avansadu hosi Borussia Dortmund, ne'ebé iha golu markadu hamutuk 27, tuir Lewandowski, ho golu hamutuk 26.


 


Top-5 sai kompletu ho Andrea Belotti, hosi Torino, ne'ebé iha golu hamutuk 25 iha kampeonatu italianu. Cristiano Ronaldo iha de'it pozisaun 16 ho golu markadu hamutuk 19, liu de'it golu ida hosi avansadu FC Porto nian, Soares.


 


Destaka mós ba Edison Cavani ne'ebé, maski iha númeru hanesan ho golu sira ne'ebé Messi marka, luta iha kampeonatu fransés, ne'ebé vale pontu 1,5, la hanesan ho liga europeia prinsipal lima ne'ebé inklui Portugal.


 


Lionel Messi iha duni époka ida fantástiku hodi fura baliza adversáriu sira, ho golu inkrivel sira ne'ebé markadu hamutuk 47 iha jogu hamutuk 46 ne'ebé halo iha époka ne'e iha kompetisaun sira hotu.


 


@SAPO Desporto

Sex | 21.04.17

Liga Europa: Manchester hosi Mourinho hasoru españól sira Celta de Vigo

SAPO TL

Jogu dahuluk marka ona ba loron-kinta, 04 Maiu, no jogu daruak akontese iha semana oinmai. 


 





Sorteiu iha loron-sesta, halo iha Nyon, Suisa, hatudu ona kuadru hosi semi final hosi Liga Europa, Ajax hasoru Lyon, no Manchester United, ne'ebé orientadu hosi José Mourinho, sukar forsa ho españól sira hosi Celta de Vigo iha jogu dahuluk.


 


Jogu dahuluk sira ajenda ba loron-kinta, 04 Maiu, ho konfrontu sira hosi Celta de Vigo-Manchester United no Ajax-Lyon, no jogu daruak sira hala'o iha semana oinmai.


 


Portugés sira José Mourinho ho Anthony Lopes, guarda-rede Lyon nian, hahú eliminatóriu iha estranjeiru.


 


Final sei halo iha loron-kuarta, 24 Maiu, iha Friends Arena, iha Solna, Estokolmo.


 


@SAPO Desporto

Sex | 21.04.17

Champions: Real Madrid-Atl. Madrid no Mónaco-Juventus iha semi final

SAPO TL

Jogu dahuluk sira hosi semi final Champions nian marka ona ba loron 02 no 03 Maio. 


 



 


Sorteiu iha loron-sesta, halo iha Nyon, iha Suísa, hatudu ona kuadru hosi semi final Champions League nian, Real Madrid hasoru nia viziñu Atlético de Madrid, no Mónako simu Juventus iha jogu dahuluk.


 


Real Madrid marka prezensa ba dala hitu konsekutivu iha semi final, Mónako hahú hosi tinan 2004, tinan ida ne'ebé lakon ho FC Porto, maka la to'o iha faze ne'e. Juventus manán ona iha jogu hitu hosi jogu ualu iha semi final, Atlético de Madrid aprezenta vitória tolu konsekutivu iha faze ne'e.


 


Semi final dahuluk halo iha loron-tersa, 02 Maiu, no ida seluk iha loron-kuarta, 03 Maiu, no jogu daruak sira ajenda ona ba semana tuirmai. Real Madrid ho Mónako hahú eliminatóriu hosi semi final iha uma.


 


National Stadium of Wales, iha Cardiff, sei simu grand final iha loron 03 Juñu, tuku 19h45 (oras lokal).


 


@SAPO Desporto

Ter | 18.04.17

Michael Essien laiha lisensa hodi joga iha Indonézia

SAPO TL

Essien, internasional ganés, joga ona iha klube sira hanesan Lyon, Chelsea, AC Milan ka Real Madrid. 


 



 


Futebolista hosi Gana, Michael Essien, kampeaun ho Chelsea hosi José Mourinho, hetan bandu hodi joga iha kampeonatu indonéziu, tanba problema sira ne'ebé halo nia labele hetan lisensa serbisu nian.


 


Médiu, ho tinan 34, halo ona jogu dahuluk ho Persib Bandung, iha loron-sábadu, iha jornada dahuluk, maibé ajénsia governamental ba desportu profisional alerta ona katak Essien laiha dokumentu nesesáriu sira hodi joga iha liga indonéziu.


 


Klube explika ona katak lisensa serbisu nian la to'o iha tempu hosi joga hosi jornada dahuluk nian, maibé Essien joga ona ho autorizasaun hosi Federasaun no Liga.


 


"Ema hotu hatene katak Essien hanesan jogador ida hosi klase mundial, la'ós hanesan imigrante klandestinu ida", kritika hosi treinador klube nian, Umuh Muchtar.


 


Maibé, serbisu sira imigrasaun nian konvoka ona reuniaun ida ho responsável sira klube nian no reprezentante ida hosi organizmu esklarese ona katak sei fó lisensa ida serbisu nian iha kazu sira hanesan ne'e.


 


Essien, internasional ganés, joga ona iha klube sira hanesan Lyon, Chelsea, AC Milan ka Real Madrid. Iha époka ikus nia joga iha Panathinaikos, antes asina agora ho ekipa indonéziu Persib Bandung.


 


@SAPO Desporto

Seg | 17.04.17

Kuaze efetivu rihun rua ba seguransa Real Madrid - Bayern nian

SAPO TL

Hafoin atentadu iha Dortmund, prepara hela medida seguransa maka'as ba jogu iha loron-tersa ne'e hosi Champions League nian.








Notísia ne'e avansa hosi Delegasaun Governu nian iha Madrid. Seguransa ba Real Madrid - Bayern Munique sei garanti hosi ema na'in 1.800, entre sira maka ajente sira autoridade nian no serbisu sira emerjénsia nian ba jogu ne'e.


 


Tuir jornald Record, forsa polísia sira kalkula katak sei ema na'in 79.000 maka sei asisti jogu, entre sira na'in 4,200 resin adeptu alemaun sira, ne'ebé sei hahú to'o iha kapital españól iha loron-segunda.


 


Ne'e hanesan jogu ida ne'ebé konsidera hanesan iha risku maka'as maibé, tanba atake iha semana liubá hasoru autokarru Borussia Dortmund nian, autoridade españól sira iha alerta máximu, hodi nune'e labele akontese buat ida antes, durante no hafoin jogu.


 


Forsa sira seguransa nian sei fahe haleu iha Estádiu Santiago Bernabéu, previstu mós vijilánsia maka's ida iha zona sira ne'ebé iha turista barak iha Madrid, inklui Aeroportu Barajas.


 


@SAPO Desporto

Qua | 12.04.17

Atentadu sei investiga hanesan insidente ho motivasaun islámiku sira

SAPO TL

Informasaun fó sai hosi justisa alemaun. 


 



Foto@ Sascha Steinbach / EPA


 


Justisa alemaun informa ona iha loron-kuarta ne'e katak atake hasoru autokarru Borussia Dortmund nian hetan hela investigasaun hanesan "atentadu terorista" ida ho "motivasaun islámiku sira", hatutan katak iha suspeitu na'in rua no kaer ona suspeitu ida.


 


Porta-vós hosi Ministériu Públiku federal alemaun, Frauke Köhler, indika ona katak kaer ona "ho temporáriu" mane ida, maibé prokurador sira seidauk desidi katak sei husu nia transferénsia ba kadeia ida.


 


Fonte hanesan explika ona katak atentadu bomba hasoru autokarru hosi ekipa futebol Borussia nian - antes hosi jogu Champions League nian hasoru fransés Mónaco - reivindika ona hosi grupu ida extrema eskerda, maibé investigador sira aponta liu ba teoria katak hanesan atake ida hosi "jihadista" islámiku sira nian.


 


Köhler konfirma ona katak hetan ona iha fatin textu tolu ne'ebé hatudu duni pista ba "jihadizmu". Nia hatete katak textu ida eziji atu hasai kasa-bombardeiru alemaun sira Tornado hosi baze ida iha Turkia no taka baze aéreu norte-amerikanu hosi Ramstein, iha teritóriu alemaun nian.


 


Nia hatutan katak kredibilidade hosi textu sira ne'e sei avalia hela.


 


Porta-vós explika ona katak polísia halo ona revista iha apartamentu sira hosi suspeitu sira nian. Frauke Köhler hatete ona katak autoridade sira iha "dúvida substansial sira" kona-ba reivindikasaun ne'ebé halo hosi grupu ida extrema eskerda nian.


 


Explozaun tolu akontese ona iha loron-tersa no kona iha autokarru hosi Borussia Dortmund nian, no defeza españól Marc Bartra, ne'ebé hetan ona operasuan, hetan kanek iha pulsu hosi liman-karuk nian.


 


@SAPO Desporto

Ter | 11.04.17

Ronaldo hanesan jogador hosi Nike ne'ebé simu osan di'ak liu iha mundu

SAPO TL

Kapitaun Portugal nian sei simu euro millaun 35 tinan-tinan durante dékada ida. 


 



 


Internasional portugés, Cristiano Ronaldo, renova ona nia kontratu patrosíniu nian ho Nike iha loron 8 Novembru 2016, no sai hanesan desportista ida ne'ebé simu osan di'ak liu iha mundu hodi halakon atleta sira hanesan Roger Federer, Rafael Nadal, Tiger Woods ho Pacquiao.


 


Revelasaun ne'e halo iha loron-segunda hosi diretór publikasaun dijital 'Okdiario.com', Eduardo Inda, durante programa 'El Chiringuito de Jugones' hosi kanal televizaun españól Mega.


 


Komentador fó sai mós katak la'ós hanesan ida ne'ebé fó sai ona, Cristiano Ronaldo laiha kontratu ba moris tomak ho marka desportivu norte-amerikanu, maibé sei simu iha tinan 10 oinmai osan ida besik euro millaun 35 líkidu tinan-tinan.


 


"Cristiano renova ona ho Nike. Sai hanesan deportista Nike ne'ebé simu osan di'ak liu iha mundu. Iha Federer, Nadal, Tiger Woods, Pacquiao [pujilizmu], maibé sé maka simu liu maka Cristiano Ronaldo. Nike aumenta kontratu ba tinan 10 no sei selu nia ho euro millaun 35 líkidu tinan-tinan", afirma hosi Eduardo Inda.


 


Iha tempu renovasaun kontratu ba patrosíniu avansa ona informasaun katak extremu portugés sei simu folin hanesan ho saláriu ne'ebé kalkula iha kontratu foun ho Real Madrid, ne'ebé besik euro millaun 24 tinan-tinan.


 


@SAPO Desporto

Pág. 1/2