Saltar para: Posts [1], Pesquisa [2]

SAPO Desportu TL

Qui | 29.06.17

Real Madrid hakarak reuniaun urjente ho Ronaldo hodi desidi portugés nia futuru

SAPO TL

Imprensa española insisti nafatin katak jogador hakarak husik Santiago Bernabéu. 


 



 


Real Madrid hakarak hasoru malu lalais ho Cristiano Ronaldo hodi hatene portugés nia intensaun sira ba époka foun.


 


Tuir edisaun online hosi jornal "Marca", diresaun hosi ´blancos` ajenda ona reuniaun ida ho avansadu portugés ba semana oinmai, loron-segunda ka loron-tersa.


 


"Cristiano nia futuru sei marka xave hosi planifikasaun desportivu hosi klube ba temporada tuirmai no hanesan buat ne'ebé maka ami tenki rezolve lalais. Ami seidauk hatene hosi Ronaldo rasik kona-ba nia intensaun. Ami konta ho nia, maibé ami tenki hatene saida maka nia hakarak", hatete hosi fonte ida hosi klube ba jornal españól.


 


Merengue sira hakarak ko'alia ho jogador hafoin final hosi Tasa Konfederasaun nian, maibé fallasu hosi Portugal hodi to'o iha final no dispensa hosi jogador hodi koñese nia oan sira ne'ebé moris durante prova halo ona Real Madrid hakarak antesipa reuniaun.


 


Imprensa española insisti nafatin katak jogador hakarak husik Santiago Bernabéu, tanba hirus ne'ebé mosu kona-ba tratamentu hosi adeptu merengue sira maibé mós hosi autoridade fiskal españól sira. Jogador hetan akuzasaun tanba halai hosi fisku, buat ne'ebé, tuir imprensa nasaun viziñu, halo jogador hirus tebes.


 


Iha Real Madrid laiha ema ida maka fiar kona-ba saída hosi jogador portugés nian. Prezidente klube nian, Florentino Pérez, la hanoin katak Ronaldo hakarak obriga nia saída hodi nune'e merengue sira aumenta nia saláriu, hanesan fó sai iha notísia iha España.


 


"Ha'u la hanoin hipóteze ne'e [saída hosi Real Madrid]. Hanesan ida ne'ebé di'ak liu ne'ebé maka ami iha, di'ak liu iha Mundu, iha kontratu... iha ema ne'ebé maka hanoin katak nia halo nune'e hodi hadi'a nia kontratu, maibé durante tinan ualu ne'e nunka akontese. Ha'u fiar katak nia sei la husu aumenta osan; nia la'ós nune'e. Labele asina kontratu foun ida tinan-tinan. Cristiano la'ós hanesan mersenáriu ka gastador. Bainhira nia hirus ne'e tanba iha relasaun ho tratamentu ne'ebé la koresponde ba buat ne'ebé nia reprezenta", Florentino Pérez afirma ba emisora española esRadio.


 


@SAPO Desporto

Ter | 27.06.17

"Saída Ronaldo nian sei hanesan lakon boot ida ba futebol españól"

SAPO TL

Antigu selesionador españól analiza ona posível saída hosi jogador Real Madrid nian. 


 



 


Vicente del Bosque, antigu selesionador españól, konsidera katak saída hosi Cristiano Ronaldo nian hosi Real Madrid sei hanesan "lakon boot ida".


 


Tékniku konsidera katak futebol españól hanesan privilejiadu tanba simu jogador hanesan internasional portugés no Lionel Messi, jogadór na'in rua ne'ebé agora daudaun hetan observasaun hosi fisku españól.


 


"Ita iha tempu Lionel Messi ho Cristiano Ronaldo nian no ami hanesan ema ne'ebé iha sorte iha España tanba bele konta ho jogadór na'in rua di'ak liu iha mundu, tanba ne'e hanesan importante ba adeptu. Aspetu seluk, maibé mós importante, maka ema tomak tenki kumpri ho obrigasaun fiskal sira", afirma hosi Del Bosque, iha deklarasaun sira bainhira hakotu eventu ida, ne'ebé maka reproduz hosi Mundo Deportivo.


 


"Ronaldo nia saída? Sei hanesan lakon boot ida. Ami iha hela momentu ne'ebé, entre nia no mós Messi, marka nafatin etapa ikus hosi ami nia futebol", nia hatutan.


 


Nia fó hanoin katak Ronaldo afirma beibeik ona katak hakarak husik klube Madrid, tanba akuzasaun sira katak la selu fisku. Kapitaun hosi ekipa luzu nian iha reuniaun ida ho Florentino Pérez, prezidente "merengue" nian hodi ko'alia kona-ba nia futuru, ne'ebé sei akontese hafoin Tasa Konfederasaun sira nian.


 


@SAPO Desporto

Sex | 23.06.17

Messi hetan autorizasaun hosi selu multa hodi evita kastigu prizaun

SAPO TL

Jogador hosi Barcelona sei selu multa ida ho folin euro rihun 252. 


 



 


Fisku españól aseita substitui kastigu fulan 21 iha kadeia ne'ebé aplika ba Lionel Messi iha prosesu fraude fiskal, iha folin euro millaun 4,1, ho pagamentu ba multa ida euro rihun 252.


 


Tuir jornal españól "El Mundo", internasional arjentinu nia advogadu sira husu ona atu nia kastigu, nune'e mós hosi nia aman no emprezáriu jogador nain (kadeia fulan 15), bele troka ho multa ida, tanba sira na'in laiha antesedente kriminal ruma.


 


Nune'e, Jorge Messi tenki selu multa ida hamutuk euro rihun 180.


 


Jogador Barcelona nian hetan akuzasaun ba fraude fiskal tolu tanba deskonfia la selu euro millaun 4,1 ba impostu sira relasionadu ho explorasaun hosi direitu sira imajen nian iha tinan 2007, 2008 no 2009.


 


@SAPO Desporto

Qua | 21.06.17

Ronaldo sei selu millaun 14 ba fisku hanesan dalan preventivu

SAPO TL

Imprensa española avansa katak jogador hakarak hamenus potensial kastigu ida. 


 



 


Cristiano Ronaldo sei selu euro millaun 14,7 ne'ebé fisku españól hatete katak seidauk selu. Tuir rádiu española Cadena Cope, asaun hosi jogador Real Madrid nian sei hanesan modu preventivu hodi, bainhira iha kondenasaun, bele iha posibilidade hodi hamenus kastigu ida.


 


Tuir komunikasaun española, Ronaldo nia asaun hanesan dalan ida hodi evita tan krimi iha posibilidade ba kondenasaun ida. Bainhira selu folin ida ne'ebé fisku españól hatete, jogador luzu evita tama iha krimi tolu tanba la hetan akordu ida ho autoridade españól sira.


 


Maski intensaun hodi selu euro millaun 14 resin, Ronaldo sei ba tribunal. Prezensa hosi jogador luzu ne'e marka ona ba loron 31 Jullu oinmai iha Tribunal Pozuelo de Alarcón, iha Madrid.


 


Cristiano Ronaldo hetan akuzasaun hosi fisku españól tanba deskonfia la selu impostu no halo fraude fiskal. La selu impostu ba fisku ne'ebé maka portugés ne'e karik halo iha folin euro millaun 14,7. Ronaldo la'ós hanesan úniku ne'ebé maka halo parte iha akuzasaun ne'e maibé fisku iha mós atensaun ba naran oioin iha España. José Mourinho mós hetan akuzasuan hosi fisku.


 


Tanba situasaun ne'e, Ronaldo tenki hanoin mós nia kontinuasaun iha Madrid maski desizaun ne'e sei hanoin fila fali. Jogador, tuir jornal A Bola, lakohi kontinua iha España no hanoin hela transferénsia ida ba klube seluk tanba klube merengue la "defende" nian. Maibé, komunikasaun sosial española fó nafatin boatu hosi posibilidade ida hosi pagamentu ne'ebé Real Madrid halo ba Ronaldo nia tusan maibé notísia ne'e seidauk iha konfirmasaun.


 


@SAPO Desporto

Ter | 20.06.17

Ronaldo lakohi halo akordu ho Finansa

SAPO TL

Jogador senti determinadu hodi hatudu nia inonsénsia iha kazu evazaun fiskal ne'ebé maka nia hasoru daudaun. 


 





Cristiano Ronaldo la aseita nafatin ho akuzasaun sira kona-ba fuga hosi fisku ne'ebé maka nia hasoru daudaun. Jornal españól "As" fó sai iha loron-tersa ne'e katak internasional portugés senti determinadu hodi hatudu katak nia la komete ilegalidade ruma no, tanba ne'e duni, maka nia lakohi halo akordu ruma ho Finansa.


 


Ministériu Públiku Madrid nian akuza ona jogador hosi Real Madrid ne'e, tuir dalan "konsiente", kria sosiedade ida hodi halo fraude ba fisku españól ho folin euro millaun 14,7.


 


Nune'e, jogador hosi Real Madrid hatete katak iha "konsiénsia hakmatek" kona-ba kazu ne'e. Iha publikasaun ne'e mós hanoin hikas katak klube españól akonsella portugés hodi selu euro millaun 14,7 ne'ebé iha akuzasaun ne'e, maibé avansadu ne'e rekuza tebes.


 


@SAPO Desporto

Sex | 16.06.17

Stallone sei apoia McGregor hasoru Mayweather: "Nia maka Rocky iha moris loloos"

SAPO TL

Kombate marka ona ba loron 26 Agostu, iha Las Vegas. 


 



AFP Photo@ Steve Marcus


 


Sylvester Stallone, protagonista hosi filmi ‘Rocky’, ne'ebé hanesan orijen hosi saga ida emblemátiku tebes iha sinema, afirma ona katak sei apoia Conor McGregor iha kombate ho Floyd Mayweather, ne'ebé marka ona ba loron 26 Agostu, iha Las Vegas.


 


Iha deklarasaun sira ba site TMZ, atór konsidera katak irlandés hanesan versaun loloos hosi personajen mítika, tanba lutador MMA ne'e hahú lahó favoritizmu ba duelu hasoru norte-amerikanu ne'ebé maka nunka lakon iha ring.


 


"Ha'u apoia nafatin 'underdog'. Nia [McGregor] maka hanesan Rocky iha moris loloos", Stallone hatete. "Maibé, bainhira ita haree di'ak, ha'u moris iha mundu ida fantazia nian. Hanesan buat ida ne'ebé nunka akontese, nune'e sei susar hatene saida maka sei akontese", nia hatutan.


 


Kombate entre Mayweather, ne'ebé fó sai nia saída iha fulan-Setembru 2015, hafoin manán kombate hamutuk 49 ne'ebé halo durante kareira, no McGregor, ne'ebé kaer balansu ida hosi triunfu hamutuk 21 no lakon dala tolu, sei halo tuir regra hosi boxe inglés nian.


 


@SAPO Desporto

Qua | 14.06.17

Shenzhen FC hasai treinador Sven-Goran Eriksson

SAPO TL

Sueku to'o iha Shenzhen iha fulan-Dezembru liubá, hodi troka holandés Clarence Seedorf. 


 



Foto@ Tracey Nearmy/ EPA



Klube futebol Shenzhen FC, ne'ebé kompete iha divizaun daruak xineza nian, hasai ona treinador sueku Sven-Goran Eriksson, ne'ebé liutiha ona hosi Benfica, hafoin lakon jornada ualu, informa hosi ajénsia notísia ofisial Xinhua iha loron-kuarta ne'e.


 


Eriksson, ne'ebé uluk treina mós italianu sira Roma, Lazio, Fiorentina ho Sampdoria no inglés sira Manchester City, sei troka ho tékniku xinés Wang Baoshan, hakerek hosi ajénsia.


 


Sueku to'o iha Shenzhen iha fulan-Dezembru liubá, hodi troka holandés Clarence Seedorf.


 


Hafoin inísiu temporada ne'ebé di'ak, ho vitória konsekutivu lima, ekipa tama iha períudu ho rezultadu sira ne'ebé ladi'ak.


 


Eriksson treina iha Xina dezde tinan haat liubá, no liu ona hosi ekipa oioin hosi superliga xineza nian Guangzhou R&F ho Shanghai SIPG, ne'ebé substitui ona hosi portugés André Villas-Boas.


 


@SAPO Desporto

Seg | 12.06.17

Mundial 2030 iha Ázia inklui Koreia-Norte?

SAPO TL

Prezidente Koreia-Súl sujere ona kriasaun hosi bloku ida hosi nasaun sira hosi nordeste aziátiku, inklui Koreia-Norte, hodi simu hamutuk Mundial 2030 nian. 


 



 


Prezidente Koreia-Súl nian, Moon Jae-in, sujere iha loron-segunda ne'e kriasaun hosi bloku rejional ida hosi nasaun sira hosi nordeste aziátiku, inklui Koreia-Norte, hodi simu hamutuk Mundial futeból tinan 2030.


 


Moon lansa ona nia proposta durante enkontru ida ho prezidente FIFA nian, suisu Gianni Infantino, ne'ebé to'o iha semana liubá iha Koreia-Súl hodi asisti ba final Mundial sub-20, ne'ebé konkista hosi Inglatera, haktuir hosi ajénsia notísia súl-koreanu Yonhap.


 


"Ha'u hanoin katak sei ajuda promove dame iha rejiaun bainhira nasaun sira hosi nordeste aziátiku, inklui Koreia-Súl no Koreia-Norte, bele organiza hamutuk Mundial ida futebol nian", hatete hosi prezidente súl-koreanu nian, iha deklarasaun sira ne'ebé haktuir hosi nia porta-vós, Park Soo-hyun.


 


Infantino, tuir Yonhap, afirma ona katak asaun ne'e sei hamosu "susar sira" maibé nia adianta katak ideia ne'e "bele sai hanesan mensajen ida ne'ebé poderozu tebes".


 


Maski nune'e, líder FIFA nian oferese ona hodi ko'alia posibilidade ho líder sira seluk hosi nordeste aziátiku, hahú hosi xinés, ne'ebé maka nia hanoin hodi hasoru malu iha semana ne'e.


 


Iha tinan 2002, Koreia-Súl no Japaun organiza hamutuk Mundial, ne'ebé konkista hosi Brazil, hosi Ronaldo, no ne'ebé Portugal sai iha faze grupu sira nian, hasoru Estadus Unidus (2-3), Polónia (4-0) no Koreia-Súl (0-1).


 


Iha inísiu tinan ne'e, Arjentina no Uruguai hato'o mós hodi organiza hamutuk Mundial 2030, liutiha sékulu ida hafoin edisaun dahuluk prova nian, ne'ebé hala'o iha Uruguai iha tinan 1930.


 


@SAPO Desporto

Sex | 09.06.17

Xina fila fali ho proposta euro millaun 200 ba Ronaldo

SAPO TL

Klube aziátiku iha dispozisaun hodi aprezenta proposta ida "extraordináriu" hodi garanti kontratasaun ba internasional portugés.  


 



 


Hanesan investimentu ida hosi futebol xinés ba Cristiano Ronaldo. Iha klube ida hosi nasaun aziátiku ne'ebé hakarak fó euro millaun 200 hodi garanti jogador Real Madrid nian.


 


Tuir avansa hosi jornal españól As, la'ós de'it folin transferénsia nian maka xoke. Publikasaun avansa katak emblema ne'e hakarak mós oferese euro millaun 120 tinan-tinan ba futebolista portugés, ne'ebé sei sai duni hanesan rekord ida.


 


Ne'e la'ós ba dala uluk maka futebol xinés hatudu interese iha Ronaldo maibé, karik ida ne'e hanesan proposta ne'ebé firmi no seguru, tanba dirijente xinés sira sei halo viajen ba Madrid, hodi hasoru malu ho Florentino Pérez, prezidente Real Madrid nian, hodi aprezenta proposta ne'e.


 


Iha fulan-Dezembru liubá, Jorge Mendes, emprezáriu hosi jogador nian, fó sai ba Sky Sports Italia, katak simu ona oferta multimilionáriu ida ne'ebé mai hosi Xina.


 


"Real Madrid simu ona oferta ida ba Cristiano [Ronaldo], maibé nia rejeita proposta ne'e tanba, ba nia, osan la'ós hanesan buat hotu. Real Madrid maka hanesan nia moris", afirma hosi ajente ne'e.


 


Fulan ida antes entrevista ne'e, jogador portugés rasik renova tiha ona kontratu ho Real Madrid to'o tinan 2021, hela ho kláuzula ida anulasaun nian ba euro biliaun ida.


 


Publikasaun adianta katak ne'ebé bele sai fali hanesan kazu, bainhira Real Madrid desidi loke odamatan ba nia saída, ba buat ne'ebé hanesan imposível no sei hanesan aat liu ba adeptu sira "blanco nian".


 


Iha loron hirak ikus ne'e mosu nafatin proposta milionáriu oioin atu Cristiano Ronaldo husik Real Madrid. Iha loron-kuarta liubá, fó sai ona katak iha emblema oioin, inklui Manchester United, Paris Saint-Germain ka klube xinés oioin iha dispozisaun hodi aprezenta proposta ida ho millaun 180 hodi kontrata Cristiano Ronaldo.


 


Jogador portugés hatán ona ba notísia ne'e iha loron hanesan. Iha aeroportu Humberto Delgado, bainhira atu halo viajen ba Letónia, hodi joga iha loron-sesta ne'e, atakante hosi Real Madrid ne'e fó sai katak "laiha buat ida maka imposível", maski karik laiha interese hodi sai hosi klube "blanco" iha tempu hirak tuirmai ne'e.


 


@SAPO Desporto

Ter | 06.06.17

Pepe konfirma katak sei husik Real Madrid

SAPO TL

Defeza agradese ona apoiu hosi ema tomak.








Pepe, Defeza-sentral portugés Real Madrid nian, konfirma ona iha loron-tersa ne'e katak sei sai hosi klube ne'ebé valida fali iha loron-sábadu liubá konkista hosi Champions League futebol nian, iha deklarasaun sira ba rádiu española Cope.


 


"Ha'u sei labele haluha domin hosi ema tomak nian, ha'u tenta fali ona ha'u nia kareira iha Real Madrid. Ne'e halo ha'u haksolok", hatete hosi internasional luzu ho orijen brazileiru.


 


Jogador fó sai mós katak la asina ho klube ida ruma", maibé adianta nafatin katak iha "iluzaun hodi kontinua manán nafatin títulu iha klube seluk", maski la adianta atu ba fransés sira Paris Saint-Germain ka ba klube seluk.


 


@SAPO Desporto

Pág. 1/2